NU PAZZIATE CU’ ‘A MORTE

Na curona 'e sanghe
p''e vvie
che s'allarga ogni juorno
cchiù assaje…
Tante,quanta guagliune
che saglieno 'ncielo
mentre attuorno
è cchiù niro che maje.
E chisà qual'è 'a molla che scatta
pe' da' forza a na mano ch'accide,
'sta viulenza c'appanna 'a cuscienza
e ca smorza , accussì , nu respiro…
'St'ombra scura ca gira pe' ll'aria,
c'arravoglia 'e cervelle d''a ggente
fà cuntrasto cu''o cielo e cu''o mare
è nu tarlo ca trase 'int''a mente.
Ma 'sta ggente nun tene nu pate,
o nu frate,na mamma , dich'io
nun se cura d''e lacreme 'e ll'ate
e nun sente maje 'a voce 'e nu Ddio ?
Che po' fà nu pueta a 'stu punto
po' cchiù scrivere vierze d'ammore ?
Guarda sulo tremmanno 'o tramonto
niro comme 'o dulore d''o core .
Po' sultanto sperà ca  dimane
se putesse cagnà che sta sciorta
e vuje giuvane dateve 'a mano
ma no , no nun pazziate cu''a morte .
(Luciano Somma)
NU PAZZIATE CU’ ‘A MORTEultima modifica: 2006-09-15T11:23:56+02:00da ridammileali
Reposta per primo quest’articolo

Lascia un commento